Dr. Pascale M. J. ENGEL de ABREU

Informatiounsbréif Fuerschung 2011

2012-01-26T01:34:00.000-08:00

Dëse Feedback Informatiounsbréif soll all deenen, déi sech fir meng Fuerschung interesséieren an se och ënnerstëtzen, Zougang zu menge wichtegste Resultater vum leschte Joer ginn.

P. Exekutiv Funktiounen a Méisproochegkeet

2011-04-05T13:28:00.000-07:00

Eng Rei vun Étuden hu gewisen datt d’Situatioun vun der Zweesproochegkeet Exekutiv Funktioune bei Kanner fördert. Bilingue Kanner sinn oft besser wei monolingue Kanner an Aufgaben déi Exekutiv Funktioune moossen. Dëst ass dorops zeréckzeféieren dass multilingual Kanner zwëschent verschiddene Sprooche mussen hin an hir wiesselen (switchen), an hir Sproch dem Ëmfeld mussen upassen. Des Kanner trainéieren also sou Gehirprozesser déi näischt direkt matt der Sprooch ze dinn hunn, nämlecht d’Exekutiv Funktiounen.

O. Firwat sinn Exekutiv Funktioune wichteg?

2011-04-05T13:25:00.000-07:00

Mir hunn erausfonnt dass Kanner mat besseren Exekutiv Funktioune méi liicht léieren an och besser an der Schoul ofschneiden. Et ass also wichteg dass d’Exekutiv Funktioune grad bei jonke Kanner richteg stimuléiere ginn.

N. Wei entwéckele sech d'Exekutiv Funktiounen?

2011-04-05T13:24:00.000-07:00

Exekutiv Funktioune setzen am frontalen Deel vum Gehir, dem sougenanntene Prefrontale Cortex deen een direkt hanner der Stir fënnt. De Prefrontale Cortex ass beim klenge Kand nach net vollstänneg ausgeprägten an entwéckelt sech virun allem während der Kandheet - vum Puppelche bis hin zu den Teenager Joren.

Mir wëssen haut dass engem Kand séin Ëmfeld eng grouss Roll an der Entwécklung vun sengen Exekutiv Funktiounen ka spillen. An enger rezenter Fuerschungsaarbecht hun mir erausfonnt dass Kanner aus sozioekonomesch schwaache Milieuen oft manner ausgeprägten Exekutiv Funktiounen opweisen. Mir mengen dass dëst doru leit dass méi aarm Famillen hire Kanner eventuell net déi Stimulatioune kenne bidden déi néideg sin fir dass sech d’Exekutiv Funktioune kennen optimal entwéckelen.

M. Exekutiv Funktioune - Wat ass dat?

2011-04-05T13:18:00.000-07:00

Exekutiv Funktiounen ass e Begrëff dee benotz gëtt fir eng Unzuel vu Gehirprozesser ze beschreiwen déi eis, ënner anerem, hëllefe fir ze plangen, eist Verhale schnell un nei Situatiounen unzepassen, fir flexibel zwëschent verschiddenen Denkprozesser hin an hier ze sprangen, a fir abstrakt ze iwwerleeën. Et handelt sech also em mental bzw kognitiv Prozesser déi d’Mënsche benotze fir hiert Denken, hiert Verhalen, an hier Emotiounen zielgerecht ze steieren.

RTL.lu VideoArchiv: D'Sprooch an der Fuerschung

2011-04-04T08:09:00.000-07:00

RTL.lu VideoArchiv: D'Sprooch an der Fuerschung

DNR Interview Mee 2009

2009-05-08T23:13:00.000-07:00

Fir de kompletten DNR Interview (6 Mee 2009) iwwert 'Aarbechtsgediechtnes a Léieren' tëschent dem Yolande Roller an dem Pascale Engel klickt weg dëse Link (eventuell muss Dier d'File downloade fir se kennen opzemaan) :

http://www.box.net/shared/ycoygcsf3m

Merci

2009-05-08T13:25:00.000-07:00

Ee grousse Merci de Kanner, Elteren, an Enseignanten aus de Gemenge:

Bauschelt, Bëschdref, Biissen, Ettelbréck, Groussbus, Housen, Kietscht, Kolmer-Bierg, Mäerzeg, Miersch, Nidderfeelen, Réiden, Sandweiler, Useldeng, Veianen, an Viichten.

ouni déi des Recherche net méiglech gewiescht wier

Relevant Literatur

2009-05-08T13:24:00.000-07:00

Engel, P. M. J. (2009). Working memory and learning: A 3-year longitudinal study of children growing up in a multilingual environment. PhD Thesis: University of York.

Engel, P. M. J., Santos, F. H., & Gathercole, S. E. (2008). Are working memory measures free of socioeconomic influence? Journal of Speech Language and Hearing Research, 51(6), 1580-1587.

Gathercole, S. E., & Alloway, T. P. (2008). Working memory and learning. A practical guide for teachers. London: Sage.

Pickering, S. J. (2006). Working memory and education. London: Elsevier.

Wéi kann ee Kanner mat Aarbechtsgediechtnes Problemer an der Klass weiderhëllefen?

2009-05-08T13:20:00.000-07:00

Deen éischte wichtege Schrëtt ass fir Aarbechtsgediechtnes-Problemer ze ërkennen an net d’Kand einfach als liddereg oder oninteresséiert ofzestempelen. Dëst ass net sou einfach, besonnesch well deene meeschten Enseignanten de Begrëff Aarbechtsgediechtnes friem ass. An desem Blog sin eng Rei Mierkmoler opgelëscht un deenen ee Kanner matt eventuellen Aarbechtsgediechtnes-Problemer an der Klass kann ërkennen.

Eltere mierke villäicht och doheem datt hiert Kand eventuell een Aarbechtsgediechtnes-Problem huet a kennen dann den Enseignant dorop uschwätzen, oder an ee Service de Guidance goe fir dem Kand säin Aarbechtsgediechtnes testen ze loossen.

Wann de Problem dann bis richteg erkannt ass kann den Enseignant eng Rei Strategien an der Klass uwenden fir dem betraffene Kand weiderzehëllefen. Zum Beispill kennen d’Aufgaben sou gestalt ginn datt d’Aarbechtsgediechtnes net allzevill belaascht gëtt (Fir weider Informatioune melt Iech weg beim Pascale Engel)

Aarbechtsgediechtnes a spezifesch Léierschwieregkeeten

2009-05-08T13:19:00.000-07:00

D’Majoritéit vun de Kanner mat spezifesche Léierschwieregkeeten am Sproocheberäich oder am Rechnen hu Problemer mam Aarbechtsgediechtnes (fir weider Informatioune – Pickering, 2006). Hei puer Beispiller:

Legastenie / Dyslexie

Legastenie (oder Dyslexie) ass eng spezifesch Léier-Schwieregkeet déi besonnesch Liesen a Schreiwe beaflosst. Niddereg Aarbechtsgediechtnes-Kapazitéit a Legastenie si staark verbonnen. Verschidde Fuerscher mengen datt nidderegt Aarbechtsgediechtnes eng vun den d’Haaptursaachen ass vun de Lies a Schreif Problemer vu Legasteniker. Beim Liesen a Schreiwe benotze mir eist Aarbechtsgediechtnes fir Buschtawe matt Sproochtéin ze verbannen, déi eenzel Téin zu Wieder zesummenzesetzen, an d’Wieder dann zu Sätz ze formen. Wa mir zum Beispill d’Wuert “Kilo” gesinn musse mir wësse wei all eenzelne Buschtaf ausgeschwaat gëtt - [K], [I], [L], [O] an dann déi eenzel Téin zu engem Wuert zesummesetzen – [Kilo]. Et ass also net erstaunlech datt Kanner matt nidderegem Aarbechtsgediechtnes mam Liesen a Schreiwe Problemer hunn.

ADHD - Hyperaktivitéit

Och Kanner matt ADHD hu meeschtens Problemer mam Aarbechtsgediechtnes. Allerdéngs si net all d’Kanner matt Aarbeschtsgediechtnes Problemer hyeraktiv. Am Geigendeel, rezent Fuerschungaarbechten hu gewisen datt Kanner matt Aarbechtsgediechtnes Problemer oft kéng impulsiv oder hyperaktiv Symptomer opweisen an de normale Klassenoflaf oft net weider stéiren.

Firwat ass d’Aarbechtsgediechtnes beim Léiere sou wichteg?

2009-05-08T13:18:00.001-07:00

D’Aarbechtsgediechtnes ass wichteg well et ee mentalen Aarbechtsraum duerstellt, an deem Informatioune kënne gespäichert gi während deem mat deene selwechten, oder aneren Informatioune geschafft gëtt. Dës Fäegkeet (vum gläichzäitege Verhalen a Verschaffen) brauch ee Kand a ville Klassenaktivitéiten.

An der Schoul mussen d’Kanner oft Informatioune verhale während deem se an enger anerer schwiereger Aktivitéit engagéiert si. An engem Diktat zum Beispill, muss de Saz deen ze schreiwen ass verhale ginn, während deem d’Kand muss iwwerleeë wei déi eenzel Wieder geschriwwe ginn.
Kanner mat niddereger Aarbechtsgediechtnes-Kapazitéit hunn oft Problemer matt sou Aufgabe well si Schwieregkeeten hunn fir déi néideg Informatiounen am Aarbechtsgediechtnes ze halen. Si vergiessen dacks eng ganz Rei Saachen, zum Beispill d’Wieder déi si solle schreiwen, d’Instruktioune vun der Aufgab, a sou weider. Besonnesch d’Schreiwe felt Kanner matt Aarbeschtsgediechtnes Problemer schwéier. Oft widderhuele si Buschtawen oder Wieder oder loossen se complet ëwech.

Wei kann een Problemer mam Aarbechtsgediechtnes ërkennen?

2009-05-08T13:16:00.000-07:00

Leider gin Problemer mam Aarbechtsgediechtnes vun den Enseignanten oft mat Problemer matt der Opmierksamkeet verwiesselt. Betraffe Kanner ginn dacks als Dreemer beschriwwen, oder als Kanner déi liddereg sinn oder einfach un näischt Intérêt hunn. Eng typesch Beschreiwung vun engem Kand matt Aarbeschtsgediechtnes Problemer ass ‘et geet zu deem engen Ouer ran an deem aner raus’.

Et ginn eng Partie Mierkmoler un deenen ee Kanner matt Arbechtsgediechtnes Problemer an der Klass erkenne kann:

* d’Kanner sinn normalerweis sozial gutt integréiert;
* a Klassenaktivitéiten sin si éischter zréckhalend;
* behuele sech oft wéi wa si net opgepasst hätten;
* hunn Problemer Aufgaben ze léise wou ee muss Saache verhalen a gläichzäiteg verschaffen
* bei komplizéierten Aufgabe gi si oft duercherneen;
* hunn meeschtens general Léierschwiergekeeten, besonnesch am Liesen, Schreiwen, a Rechnen.

Beaflosst d’ Aarbechtsgediechtnes d’Léieren?

2009-05-08T13:11:00.000-07:00

An engem grousse Fuerschung Projet un deem 122 Lëtzebuergesch Kanner deelgeholl hunn, hu mer gesinn datt Tester vum Aarbechtsgediechtnes an der Spillschoul engem Kand säi schoulesche Progrès 2 Joer méi spéit konnte virausgesinn (Engel, 2009). De Kanner hiert Aarbechtsgediechtnes gouf an der Spillschoul getest, zesumme matt Tester aus aner kognitive Beräicher wei z.b. IQ oder phonologësch Bewosstheet. Zwee Joer méi spéit sinn déi selwecht Kanner am Lëtzebuergeschen, Däitschen, Franséischen, Liesen, Schreiwen, a Rechnen getest ginn.

D’Aarbechtsgediechtnes an der Spillschoul war staark matt de Léierberäicher déi am 2ten Schouljoer getest goufe verbonnen. D’Aarbechtsgediechtnes ass kloer als beschte Predikter rausgestach - besser wei IQ oder phonologesch Bewosstheet - fir schoulesch Leeschtungen 2 Joer méi spéit.

Wann een d’Kanner am zweete Schouljoer op Grond vun hirer Aarbechtsgediechtnes Kapazitéit an zwou Gruppen opdeelt, weisen d'Resultater däitlech dass méi héich Aarbechtsgediechtnes-Kapazitéit mat bessere schoulescher Leeschtung verbonnen ass. D’Resultater hu weider gewisen dass d’Aarbechtsgediechtnes-Kapazitéit besonnesch d’Liesen, d’Schreiwen, an d’Rechene betrëfft.

Kann een d’Kapazitéit vum Aarbechtsgediechtnes moossen?

2009-05-08T13:09:00.000-07:00

D’Moosse vum Aarbechtsgediechtnes ass eigentlech ganz einfach. Mir hunn eng Rei Aufgaben entwéckelt fir d’Aarbeschtsgediechtnes bei Kanner zu Lëtzebuerg ze testen (Engel, 2009). Dës Tester kënne scho kléng Kanner aus der Spillschoul leisen. An deene meeschten Aufgaben geet et dorëm Informatiounen ze verhalen a gläichzäiteg ze verschaffen.

Ass d’Aarbechtsgediechtnes vu Persoun zu Persoun verschidden?

2009-05-08T13:08:00.000-07:00

All Mënsch huet seng perséinlech Aarbechtsgediechtnes Limiten. Sou kann zum Beispill eng schwiereg Kapprechnung d’Aarbechtsgediechtnes vu verschiddene Leit iwwerfuerderen, während anerer kéng Problemer hunn fir sou eng Aufgab am Kapp ze rechnen.

D’Kapazitéit vum Aarbechtsgediechtnes entwéckelt sech besonnesch während der Kandheet. Kanner hunn normalerweis eng zimlech kleng Aarbechtsgediechtnes-Kapazitéit, déi graduell an d’Lut geet bis hin zu den Teenager-Joere wou den Erwuessenen Niveau erreecht gëtt (ongeféier 2 bis 3 mol méi grouss wéi bei engem 4 Joer ale Kand).
Ënnerscheeder an der Kapazitéit vum Aarbechtsgediechtnes kënne bei Kanner ganz grouss sinn. Dacks ass et de Fall datt Kanner mat niddereger Aarbechtsgediechtnes-Kapazitéit dëse Réckstand net ophuelen.

Wat geschitt wann Informatiounen aus dem Aarbechtsgediechtnes verluer ginn?

2009-05-08T13:07:00.000-07:00

Wann Informatiounen aus dem Aarbechtsgediechtnes verluer ginn, si se fir ëmmer fort. Wann sou eppes geschitt muss een d’Informatiounen nees eng Kéier nei an d’Aarbechtsgediechtnes aginn. Bei enger Kapprechnung zum Beispill, misst een d’Rechnung nees vu vir ufänken.

Huet d’Aarbechtsgediechtnes Limiten?

2009-05-08T13:06:00.000-07:00

Leider kenne verschidde Situatiounen d’Aarbechtsgediechtnes limitéieren. Hei puer Beispiller:

· Oflenkung
Ee plëtzleche Gedanken oder eng Ennerbriechung kënnen den Inhalt vum Aarbechtsgediechtnes auswëschen

· Zevill Informatiounen oder ze schwiereg Aufgaben
D’Quantitéit vun den Informatiounen déi mir am Aarbechtsgediechtnes kënnen halen ass limitéiert. Wa mir zum Beispill probéieren 589 mat 923 am Kapp ze multiplizéieren ass et gutt méiglech datt mir eis iren. Sou eng Aufgab iwwerfuerdert d’Aarbechtsgediechtnes vun deene meeschte Leit.

Ass d’Aarbeschtsgediechtnes dat selwecht wei Intelligenz?

2009-05-08T13:04:00.000-07:00

Aarbechtsgediechtnes an Intelligenz (oder IQ) sin staark verbonne mee déi zwee ënnerscheede sech an enger wichteger Saach: Moosse vum Aarbechtsgediechtnes gëtt eis eng Iddi vun engem Kand sengem Léier Potential. Heiranner ënnerscheet sech d’ Aarbechtsgediechtnes vun engem IQ Test deen oft Wësse moosst dat Kand doheem oder an der Schoul geleiert huet. Tester vum Aarbechtsgediechtnes allerdéngs moossen net des ugeléiert Fäegkeeten, mee dem Kand seng Kapazitéit (oder säi Potential) fir nei Informatioun opzehuelen an ze verschaffen (Engel, Santos, & Gathercole, 2008).

‘Aarbechtsgediechtnes’, wat ass dat?

2009-05-08T10:24:00.000-07:00

Aarbechtsgediechtnes ass eis Kapazitéit fir Informatiounen iwwert eng kuerz Zäit ze verhalen a gläichzäiteg ze verschaffen. D’Aarbechtsgediechtnes ass also eng Aart vu mentalem Notizblock de benotzt gëtt fir wichteg Informatiounen aus dem alldeegleche Liewen ze späicheren.

Ee gutt Beispill vun eng Aktivitéit wou d’Aarbechtsgediechtnes zum Asaz kënnt ass Kapprechnen. Probéiert mol fir 56 mat 17 ze multiplizéieren ouni Bic a Blat oder Rechemaschinn ze benotzen. Fir d’alleréischt mussen déi zwou Zuelen 56 a 17 am Aarbechtsgediechtnes gehale gi. Da gi schons gewosste Regelen vun der Multiplikatioun ugewannt déi zu neien Zuele féieren, déi nees eng Kéier am Aarbechtsgediechtnes musse bleiwe fir zum richtege Resultat ze kommen. Ouni d’Aarbechtsgediechtnes wiere mir net fäeg fir sou komplizéiert Aufgaben am Kapp ze rechnen. Fir dëse Problem ze léise musse mir verschidden Informatioune verhalen (z.b. déi eenzel Resultater) während deem aner Informatioune verschafft gi (multiplizéieren oder addéiere vun de verschiddene Resultater).